Увервлӓ

«Войнан кишӓжӹ»

        Российӹштӹ ӹлӹшӹвлӓ гишӓн, кӱ служебный долгым сӓндӓлӹкнӓ гӹц ӧрдӹжӹштӹ исполняен, 15 февральын мӓ ӓшӹндӓрӹмӓш кечӹм пӓлемденӓ. Ти кого датым сӓндӓлӹкнӓн историштӹ такеш агыл айырымы. Ти кечӹн, 25 и перви, Афганистанын территори гӹц советский войскавлӓм лыктын пӹтӓрӹмӹ.

        Афган вырсы паштек шукы жеп эртен гӹнят, тӹдӹн ойхан кишӓжӹ кӹзӹтӓт шижӓлтеш. Шукы сӓмӹрӹк ӹрвезӹ вырсы тылсалымжым ӹшке сӹнзӓжӹ доно ужын дӓ, цилӓн агыл тӹшец мӹнгеш пӧртӹлӹнӹт. Мӓмнӓн района гӹцӹн 8 млоец ӹшке вуйыштым йӓл сӓндӓлӹкеш пиштенӹт, тидӹ:

Роберт Стекольщиков - Шимйӓр гӹц,

Коля Родионов - Эпӓй гӹц,

Юра Мамуткин - Ӓлдисола гӹц,

Серёжа Сидоров – Шурмар вел,

Руслан Сиваев – Йынготы гӹц,

Вова Гаврилов - Пӹнгельйӓл гӹц,

Серёжа Кирулкин – Козьмодемьянск хала,

Миша Матвеев – Озёрка.

        Ти лӱдӹшлӓ веремӓм ӓшӹндӓрен, Н. Игнатьев лӹмеш Краеведческий музейӹштӹ «Войнан кишӓжӹ» лӹмӓн выставкы пачылтын. Выставкышты фотографивлӓм, салтаквлӓн  дӓ нӹнӹн туан дон лишӹлвлӓштӹн ӓшӹндӓрӹмӓшвлӓм анжалаш лиэш.

        Ти вырсеш колышы дӓ веремӓ шодеок ӹлӹмӓш гӹц кешӹ салтаквлӓн ӓтя-ӓвӓштӹлӓн, тылыкеш кодшы вӓтӹвлӓштӹлӓн земля якте кымалына, а воин-интернационалиствлӓлӓн, военный конфликтвлӓштӹ участвуйышывлӓлӓн цаткыды шулыкым, цӓшӹм, пурым веле согоньленӓ.

 

©2013. Все права защищены.