Увервлӓ

У СЕМӸМ ШАКТЫШЫ.

      25 сентябрьын Пӹзӹкныр кӹдӓлӓш школышты М.И. Кудряшовым ӓшӹндӓрӹмӓш кечӹ эртӓрӓлтӹн. Программым мары йӹлмӹм тымдышы О.С. Микрякова йӓмдӹлен дӓ виден.

      Лач ти кечӹн Михаил Ивановичӹн шачмыжылан 55 и темеш ыльы. Лыдшывлӓ тӹдӹм пиш яжон пӓлӓт. Вет тӹдӹн кид лӹвецӹнжӹ шукы шайыштмаш, повесть, драма, очерк дӓ притчывлӓ лӓктӹнӹт. Эчежы Михаил Иванович кырык марла йылмӹ доно лӓкшӹ «У сем» журналын редакторжы ылын. М. И. Кудряшовым ӓшӹндӓрӓш шукын толыныт: пелӓшӹжӹ Любовь Михайловна, тӓнгвлӓжӹ, тымдышывлӓжӹ, пуры пашкудывлӓжӹ, Кырык мары районын образовани дӓ культура отделын пӓшӓзӹвлӓ. Пӹзӹкныр кӹдӓлӓш школын тымдышывлӓ дӓ тыменьшӹвлӓ ӹшке сценариштӹ гач М. И. Кудряшовын ӹлӹмӓш корныжым кымдан пачын пуэвӹ. Салымсолаштышы Н. Игнатьев лӹмӓн краеведческий музейӹн пӓшӓзӹвлӓ фондышты ылшы материалвлӓм, фотовлӓм вӹкӹ лыктын, «У семӹм шактышы» лӹмӓн выставкым йӓмдӹленӹт, а библиотека пӓшӓзӹвлӓ книгӓ выставкым оформляенӹт.

      Ӹдӹр-ӹрвезӹвлӓ ти кечӹнок М.И. Кудряшов лӹмеш эртӓрӓлтшӹ кроссышты участвуенӹт.

      Мероприяти гачок шижӓлтӹ: Михаил Ивановичӹн шӱлӹшӹжӹ саганаок ылеш.

      

©2013. Все права защищены.