Увервлӓ

«Тымдышы, писатель, краевед»

 

         16 январьын 2014 ин Игнатьев лӹман районный библиотекышты Авенир Арсентьевич Апатеевлäн 75 и лӹмеш кого айо эртäрäлтӹн.

         Кÿ техень Авенир Апатеев  манын ядмыкы, хоть-кÿжäт пäлäт. Тӹдӹ писатель, поэт, краевед, тенгеок Авенир Арсентевич  мары йӹлмӹ дон литературым шукы и тымден, кого буква гӹц Тымдышы ылеш.  

         Тӹдӹ 1939 ин 1 январьын Тьоминсолаэш тымдышывлäн семняеш шачын. Äважы – Клавдия Петровна, - колхозница, äтяжы – Арсений Иванович, 1935-40 ивлäн Марьясола тӹнгäлтӹш школышты тымдышы ылын, фронтышты фашиствлä доно кредäлӹн, 1949 ин Родина верц вуйжым пиштен.

         Авенир Арсентьевич Апатеев  сирäш тӹнгäлӹн студент ылмы годымок. Пӹтäриш лыдышыжым «За педагогические кадры» институтын газетӹштӹ пецäтленыт. Вара лыдышвлäм, шайыштмашвлäм дä очерквлäм «Ленин корны», «Ленинский путь», «Марий коммуна» газетвлäэш пецäтленӹт. 1979 ин Мары книгä издательствышты пӹтäриш сборник «Мычашдымы курым» лäктӹн.  Варажы «Авасир», рушла«Живу и помню», «Арвäтӹвлä», «Сказание о земле Акпарса» да  шукы молат пецäтлäлтӹнӹт.

         Институтышты тыменьмыжы годымок тӹдӹм кырык мары йӹлмӹ дä мары литаратуры докы äтяжӹн шоляжы Алексей Иванович да тӹдӹн пелäшӹжӹ Тамара Гавриловна кымылангденыт. Нӹнӹм писатель тагачат пурын äшӹндäрä. Алексей Иванович Апатеев доно Авенир Арсентьевич 7 классышты тыменьшӹвлäлäн «Мары учебник» книгам моло йäмдӹленӹт.

         Пелäшӹжӹ Земфира Гордеевна доно Элина, Галя ӹдӹрвлäштӹм тымдышын корнышкы шагалтенӹт, 4 ыныкаштымат ӹнян эдем лиäш кымылангдат.

         Ти айошкы тымдышывлä, библиотекырьвлä, тенгеок мырызывлä, поэтвлä Авенир Апатеевым кымылангаш толыныт. Ти кечӹн юбилярын мырывлäжä йонгалтыныт, тидӹ «Со вазат äшеш», «Учителем»,  «Вäшлимäш», «Йыл тӹрӹштӹ» дä молат.

         Мероприятим виденӹт краеведени отделын пäшäлӹшӹвлä Л. Митрюшкина да Э. Кондратьева.

   

©2013. Все права защищены.