Увервлӓ

«Тетявлӓм ӹшӹклӹмӹ кечӹ»

     Кукшыгечӹн, 31 майын, Эмӓн сола библиотекын вуйлатышыжы Степанова О.С., мӹньӹм (Бычкова Викам) дӓ эче нӹл ӹдӹр – ӹрвезӹ тӓнгвлӓем: Васильева Янам, Сидукова Аням, Бычкова Настям дӓ Степанов Владым Микрӓк солаш «Тетявлӓм ӹшӹклӹмӹ кечӹ» айош кандыштын. Толмы семӹнь сӹнзӓшкӹнӓ тӧрӧк кого батут тӹкнӹш. Кӧргӹшкӹрӓк пырымыкына пиш шукы тетявлӓм ужынна, нӹнӹ командывлӓшкӹ пайылалтыныт. Мӓӓт, шукым вычыдеок, йӹлерӓк ӹшке командынам погышна. Шукы конкурсвлӓштӹ участим принимаеннӓ: йамдар гӹц пӹсӹнрӓк  сокым йӱӓш цаценнӓ, скрепкывлӓ гӹц сек кого цепочкым погеннӓ, сек яжо плакатым рисуеннӓ, мячик доно эстафетӹштӹ мадынна дӓ эче мол конкурсвлӓштӓт ылынна. Цилӓ сӹнгӹшӹлӓн когон яжо призвлӓм подаренӹт. Изи Владиклӓнӓт йарал конкурс вӓрештӹн. Садикыш кашшы тетявлӓлӓн яжо конкурсым шанен лыктыныт: цветной пумага гӹц пӹчкеден лыкмы олмавлӓм, грушавлӓм дӓ мӧрвлӓм тӧр корзинӹш пиштӹмӹлӓ ылын. Владик призеш мыльный пузырьвлӓм вӓрештмӹжӹлӓн пишок сусу лин. Вара, сусу пар доно, канатымат шыпшаш кен.

    Конкурсвлӓ пӹтӹмӹкӹ мӓ сладкий ватым дӓ попкорным качкаш кеннӓ, батутышты тӹргештӹлӹннӓ дӓ карусельӹштӹ катаеннӓ. А сек яжо айошты ылын, кынам цилӓ тетялӓн такеш морожныйым дӓ сокым пуенӹт. Мӓлӓннӓ ти кечӹ пиш когон келшен.

Бычкова Вика,  5 кл. Эмӓн сола школ.

©2013. Все права защищены.