Увервлӓ

"Шöртньӹ шӹжӹ мыры"

15-шӹ ноябрьын Йылйӓл культура томашты кырык мары эстрадын шӹдӹрвлӓн «Шöртньӹ шӹжӹ мыры» сӹлнӹ концерт эртӓрӓлтӹн. Йылйӓл солан ӹлӹшӹвлӓ толшы артиствлӓм пиш пурын вӓшлинӹт дӓ шокшын лапам шинӹт, нӹнӹлӓн кымылым лÿктенӹт. А артиствлӓ улы шÿм вашт  мыренӹт, куштенӹт, шке талантышты доно халыкым сусуэмденӹт. Вады кыт мыч сусу кымыл дӓ шокшы кӹл анжышывлӓ дӓ артиствлӓ лошты кӹрӹлтде, седӹндон концертшӓт пиш куштылгын, веселӓн эртен.

Концертӹм видӹшӹвлӓ, Людмила Атласкина дӓ Иван Синичкин, каждый артистӹм, каждый коллективым кымылын сценӹш ÿжӹнӹт. Концертын программышты «Аяр» группа, «Верность» вокальный ансамбль, тенгеок мырызывлӓ Борис Петров, Валентина Костюнина, Зоя Смирнова, Зинаида Юшкина, Маргарита Синуткина, Елена Логинова, Елена Давыдова, Наталья Веюкова дӓ сек сӓмӹрӹк мырызы Ариана Веюкова. Концертӹн программым Виловат культура томан артиствлӓ пиш сӹлнештӓренӹт, кыдывлӓ шукы йиш куштымашвлӓм анжыктенӹт, кыдывлӓм танцевальный ансамбльым вуйлатышы Андрей Гаранин шӹнден. Пуры шӹжӹ вады пиш яжон эртен дӓ сола халыклан шукы жепеш ӓшӹндӓрӓш кодеш. Йылйӓл халык тенге сусуэмдӹмӹлӓн пиш кого таум Кырык мары районын культура отделлӓн дӓ Я. Эшпай лӹмеш халык культура центрӹн методический отделлӓнжӹ келесӓ, вет техень сӹлнӹ вады нӹнӹн шытыр доно лин.

   

©2013. Все права защищены.