Увервлӓ

«Шӧртньӹ кидвлӓ» объединени

Шукердӹ агыл Эмӓн сола библиотекын «Шӧртньӹ кидвлӓ» объединениш кашшы тетявлӓлӓн Светлана Вадимовна дон Оксана Сергеевна первиш кид доно тӹрлӹмӹ пӓшӓвлӓм анжыктенӹт. Тетявлӓн тӹрлӓш тыменяш кымылышты лӓкшӹ манын, библиотекырьвлӓ Эмӓн тетя садын воспитательжӹм, Шонгина Любовь Геннадьевнам, мастер-классым анжыкташ ӱжӹнӹт. Тӹдӹ сусунок библиотекыш толын, сагажы ӹшке кид тӹрлӹмӹ пӓшӓлӓжӹм канден.

Любовь Геннадьевна пӹтӓриок анжыктен хӓдӹрвлӓм, кыдывлӓ тӹрлӹмӹ пӓшӓм ӹштӹмӹ годым керӓл ылыт, тидӹ: тӹрлӹмӹ орта, ош цӹреӓн савыц, вӹцкӹж им, шукы цӹреӓн мулине шӹртӹвлӓ, кайыц, карандаш дӓ вазымы пумага. Вара, тетявлӓ доно иквӓреш, Любовь Геннадьевна сакой пеледӹшвлӓм вазымы пумага гач ош савыц вӹкӹ ваштен дӓ йӓмдӹ суретӹм тӹрлӓш тӹнгӓлӹн. Тӹрлӹмӹ годым кид мастар ӹшке секретвлӓжӹм пачын – пукшем сӹнзӓш ӹнжӹ тӹкнӹ манын, тӧр пиштен мошташ тымден; имӹм тӹрлӹмӹ покаш колташ шӱден – вара тӹрлӹмӹ пӓшӓ кӹжгӹрӓк лиэш, йӧнӓн вӓрвлӓ ак пӓлдӹрнеп.

Библиотекырьвлӓӓт, тетявлӓӓт ӧрӹнӹт дӓ цӱдеенӹт, кыце Любовь Геннадьевна пӹсӹн дӓтӹ веремӓнок итрӓӓн ӹшке тӹрлӹмӹ пӓшӓжӹм ӹштен.

Эмӓн тетя садыштыш мары тыгырвлӓмӓт Шонгина Л.Г. ӹшке тӹрлӹмӹ пӓшӓвлӓжӹ доно пиш яжон олмыктарен.

Кӹзӹт Эмӓн сола библиотекыштына Шонгина Любовь Геннадьевнан кид доно тӹрлӹмӹ пӓшӓвлӓжӹм анжыкташ манын, изи выставкым пачынна дӓ цилӓм ӱжӹнӓ.

 

Эмӓн сола библиотекын вуйлатышыжы Степанова О.С.

©2013. Все права защищены.