Увервлӓ

Пеледӹш пазар

      Пеледӹш – земля вӹлвӓлӹн цевержӹ. Пеледӹш мӓмнӓн ӹлӹмӓшнӓм ӹвӹртӓ, кымылым лӱктӓ. Тидӹм тумаенок 11 сентябрьын Эмӓн сола культура пӧрт анзылны пӹтӓриш гӓнӓ районыштыш «Пеледӹш пазар»  мероприяти эртӓрӓлтын.

      Пазар пӹтӓриш гӓнӓ веле лин гӹнят, шукы эдемӹм поген. Пазарышты пеледӹшвлӓм, семенӓвлӓм выжаленӹт, икӹжӓк-иктӹштӹ доно вашталтенӹт. Тенгеок ти пазарышты выставка ылын, «Ӓрвӓтӹ ӓршӓш», «Куштымы цӓш», «Якшар пеледӹш», «Окня анзыл пеледӹш», «У шачшы», «Ямак пеледӹш» конкурсвлӓ эртӓлӓлтӹнӹт.

      Айом цеверемдӓш ӱжмӹ мырызы хынавлӓ толыныт – Борис Петров, Ирина Юшкина, Зинаида Игнатьева, Фаина Васикова, Зинаида Юшкина. Тенгеок ти концертым Эмӓн сола клубын тетя ансамбль «Эмӓн вел» дӓ изи мырызы Лида Антропова олмыктаренӹт.

      Концерт пӹтӹмӹкӹ цилӓ хына залышты погыненӹт, кышты пеледӹшвлӓ гишӓн шукы шаям попенӹт. Атласный лентӓ гӹц розам ӹштӹмаш доно Симолкина Светлана мастер-классым эртӓрен.

      Тумайымаштына, ти айо цилӓлӓн келшен дӓ ӓшеш кодын. Шошым у пазар лиэш, кышкы цилӓн рассадым выжалаш канден кердӹдӓ.

      Улы кымылын выченӓ.

          

©2013. Все права защищены.