Увервлӓ

Мырызы шÿмäн поэт

 25-шӹ ноябрьын Пайскырык сола культура томашты Мары Эл Республикын дä Россий Федерацин культурын заслуженный пäшäзӹжӹ, Олык Ипай лӹмеш Мары Эл Республикын госпремин лауреат, поэт, журналист дä общественный деятель Николай Петрович Егоровым äшӹндäрӹмäш вады эртäрäлтеш. Тӹшкӹ тӹдӹн тäнгвлäжӹ, туанвлäжӹ, поэтвлä, композиторвлä, мырызывлä дä, седӹ, Пайскырык вел халык, тенгеок Пайскырык школын тыменьшӹвлä толыт. Ти вадын сцена гӹц Николай Егоровын сӹлнӹ лыдышвлäжӹ дä тӹдӹн шамаквлäэш сирӹмӹ  мырывлä йонгалтыт лиэш.     

Егоров Николай Петрович 25-шы ноябрьын 1936-шы ин Кырык мары районын Шурмар солаэш шачын. Пайскырыкышты шӹмиäш школым тымень пӹтäрӹмӹкӹ, Козьмодемьянск халан педучилищӹштӹ 1951 – 1955 ивлäн тыменьӹн, а вара – Н.Крупская лӹмеш МГПИ-н историко-филологический факультетӹштӹ. Пединститутым тымень пӹтäрӹмӹ паштек руш йӹлмӹ дä литература кафедрӹштӹ тымдымаш пäшäм виден, тенгеок Н.Крупская лӹмеш МГПИ-н комсомол комитетӹн секретарь ылын (1961 – 1964 ивлä). 1964-шӹ и гӹц 1968-шӹ и якте «Молодой коммунист» газетӹн редакциштӹ пäшäлен, кышты пропаганда отделым вуйлатен, тӹшец вара Мары АССР-ын Министрвлäн Совет пеленшӹ радиовещанин комитетӹштӹ пäшäлен.

         КПСС ЦК-ан Высший партийный школышты журналистика факультетӹм пӹтäрӹмӹ паштек шукы жеп Николай Егоров Мары телевиденин дä радиовещанин тӹнг редактор ылын, вара «Акпарс» радиостудиштӹ передачывлäм виден. Журналистский пäшäштӹ тӹдӹ цилäжӹ 40 и утла труен.

         Егоров Николай Петрович - Мары Эл Республикын дä Россий Федерацин культурын заслуженный пäшäзӹжӹ, радиожурналистикышты заслугывлäжӹ гишäн КПСС Мары обкомын дä Мары АССР-ын Министрвлäн Советӹн почетный грамотывлä, тенгок молы грамотывлä  донат пäлемдäлтӹн, «Отличник телевидения и радиовещания СССР» знак, «Знак Почета» орден доно награждаялтын, тенгеок Олык Ипай лӹмеш Мары Эл Республикын Государственный премин лауреат лӹмӹм сылен нäлӹн.

         Тӹдӹ 17 книгäн автор (лыдышвлä, поэмывлä, басньывлä, мырывлä, руш дä мары йӹлмӹ доно сирӹмӹ очерквлäн сборниквлä), тыменьмӹ дä тымдымы пособивлäн, кырык мары школвлäлäн дä тетя садвлäлäн программывлäн автор.

          Н.П. Егоров 50 и нäрӹ литературный творчествышты пäшäлен. Шукы поэмым, лыдышвлäм, басньывлäм, очерквлäм сирен. Лӹмӹнок шукы лыдышым  мырывлäлäн сирен, тенгелäн композиторвлä дон иквäреш 200 нäрӹ мыры сирäлтӹн, кыдывлä логӹц шукыжок «Марий Эл» ВГТРК-ан фондышты дä Козьмодемьянск халан студиштӹ перегäлтеш. Николай Егоровын шамакеш мырывлä тагачат йонгалтыт. 40 утла мыры текствлäм тӹдӹ тетявлäлäн сирен, нӹнӹ учебниквлäштӹ, тетявлäлäн мыры сборниквлäштӹ пецäтлäлтӹнӹт.

          Егоров Николай Петрович Кырык мары районын дä Козьмодемьянск халан Гимнвлäн текствлäн автор ылеш.

          Шукы и мычкы композиторвлä дон иквäреш Н. Крупская лӹмеш МГПИ-н «Пеледӹш» дä МарГУ-н «Цолга шӹдӹр» студентвлäн ансамбльвлäлäн мыры репертуарым ӹштен шалген. Николай Егоров тидӹ ансамбльвлäм ӹштӹшӹ, цымырышы ылын.

          Николай Егоровын шамаквлäэш мырывлä каждый инок «Мыры» конкурсвлäшты йонгалтыныт дä шӹренок призвлä доно пäлемдäлтӹнӹт.

          Тӹдӹн лыдышвлäэшӹжӹ шукы марын композиторвлä В. Куприянов, А.Сидушкина, В. Захаров, В. Соловьев, А.Соснов, С. Метелкина, М. Атласкин, И. Ванюков дä молат сиренӹт. «Тӹдӹн творчествыжы - тидӹ кырык мары искусствышты целый явлени», - техень оценкым шке статьяштыжы Мары Эл Республикын Государственный премин лауреат, Мары Эл Республикын халык поэт Геннадий Матюковский пуэн («Марийская правда», 1991 и  25-шӹ ноябрь).

          Тӹдӹн шамаквлäэш мырывлä венгр, финн, эстон, суасламары йӹлмӹвлäш сäрӹмӹ ылыт.

          Н.П. Егоров 90 утла сценарим А. Амельченкон фильмвлäлäн сирен, дä шукыжок нӹнӹ логӹц лауреат лӹмӹм, призвлäм всероссийский конкурс дä фестивальвлäштӹ нäлӹнӹт.

          Н.П. Егоров тенгеок сäрӹмӹ пäшäмäт виден. Остатка жепӹн кырык мары йӹлмӹш К. Васинӹн «Ушнымаш» романым, Р. Стивенсонын «Остров сокровищ», У. Шекспирын «Макбет» произведенивлäм кырык марлаш сäрен. Тӹдӹн сäрӹмäш пäшäжӹ М.А. Кастрен лӹмеш финн обществын преми доно пäлемдӹмӹ.

          Николай Егоров шукы-шукы и мычкы «Пеледӹш» ансамбльын репертуарлан лӹмынок шукы йиш сценарим, лыдышвлäм, мырывлäм сирен, тематический программывлäм йäмдӹлен, соок ансамбльын виäнгмыжӹ верц шытырланен, вет «Пеледӹш» ансамбльжым шке шачыктен дä тӹдӹн пӹтäриш вуйлатышыжы ылын. «Пеледӹш» ансамбльын концертвлäжӹ доно соок радио донат, телепередачывлä гачат халыкым сусуэмден, мары радио дä телевиденин фондыш ансамбльын репертуар гӹц шукы сек яжо мырывлäжӹм сирен, переген коден.

©2013. Все права защищены.