Увервлӓ

«Марьясолан историйжы» книгӓлӓн – 15 и.

      «Книгӓ - пӓлӹмӓш коловец», - маныт. Лачокат, книгӓ гӹц тамамат пӓлен нӓлӓш лиэш. Такеш агыл шошымшы каникул годым книгӓн праздникым ӓрня кыт мычкы эртӓрӓт. Кулаково библиотекыштат техень ӓрня  эртен. Книгӓ ӓрнян ик мероприятийжы «Книгӓвлӓ -  юбилярвлӓ» маналтын. Шамак толшеш, «Слово о полку Игоревелан» тене 215 и, А. Пушкинын «Руслан и Людмилалан» - 195 и, Л.Толстойын «Севастопольские рассказылан» - 160 и. А.Твардовскийын «Василий Теркин» поэмылан – 70 и, а мӓмнӓн кырык марла краеведнӓн В.Зубковын «Марьясолан историйжы» книгӓлӓн – 15 и. Ти мероприятийыш  книгӓн авторжат толын. Тӹдӹ книгӓ кыце лӓкмӹ гишӓн попыш. «Цилӓжӹ 100 книгӓм лыктынам, - маньы В.Зубков.- Ӹлӓлшӹвлӓ чӹдэмӹт, сола гишӓн, эдемвлӓ гишӓн пӓлӹмӹ шоэш, книгӓм ядышташ тӹнгӓлевӹ, Усолаштат заказевӹ, книгӓ уке лин колтыш, кӹзӹт ӹнде редкость манаш лиэш.» Ти книгӓэш рисуноквлӓжым ти солаэшок шачшы Надежда Ягодарова рисуен пуэн. Пӹтӓриш страницыштыжы Марьясолан планжы, вара - Марья дон Сарамбай шалгат, а пакылажы Марьясолан легендыжы. Пакыла ти солан вырлыквлӓжӹ гишӓн сирӹмӹ. «Пӹтӓриок кого иӓшӓнвлӓн фотографийыштым анжыктымы. Ти солашты кӱкшы учебный заведнийымок нӹллӹн тымень пӹтӓренӹт. Кӹзӹт веле тетявлӓӓт чӹдемӹнӹт, Марьясолажат изиэмеш, охыр томавлӓ шукемӹнӹт… Сола пӹтӓ, а тӹнӓм… шукын ылевӹ, шукын ылевӹ…»-попыш Валериан Александрович. Кулаково школыштыш вӹзӹмшӹ классышты тыменьшывлӓ интерес доно книгӓн авторын шайыштмыжым колыштевы.

      Вара  тетявлӓ «Книгӓвлӓ-юбилярвлӓ» презентацийым анжевы, а Валериан Александрович Зубковлан яжон шайыштмыжы гишӓн, тау шотеш, А. Линдгренӹн «Кужы цылкан Пеппи» книгӓм, кыдылан тене 70 и темеш, кычыктымы.

        Кулаково библиотекын библиотекарьвлӓ    Г.Ямолкина, А. Когаринова

©2013. Все права защищены.