Увервлӓ

Лӹмжӹ доно когоэшненӓ

 

        Районыштына, апрель тӹлзӹн пӹтӓриш декадыжым кырык мары литературылан негыцӹм пиштӹшӹ Н.В. Игнатьевлӓн айырат.

       1 апрельӹн Республика кӱкшӹцӹштӹ «XIV Н.В. Игнатьев лӹмеш лыдмаш» научно-практический конференци  эртӹш.

       А 9 апрельӹн районыштышы тыменьшӹвлӓ дӓ тымдышывлӓ Н.В. Игнатьев лӹмӓн Краеведческий музейӹш постарневӹ. Овуцаш пырымылаок, тиштӹ и йӹде Никон Васильевич Игнатьевӹм ӓшӹндӓрӹмӓш вадывлӓ эртӓрӓлтӹт.

       «Ӹлӹмӓш сотемжӹ манын, тӓмдӓм сӹгӹрӓш мишӹм»,  тенге маналтын Н.В. Игнатьевӹн шачмыжылан 119 и шомы лӹмеш вӓшлимӓш.

       Поэт, прозаик, драматург, публицист, критик – теве техень эдем лин Кырык сирӹштӹшӹ, Салымсолан хресӓнь семняэш шачшы ӹрвезӹ. Эчежӹ тӹдӹ мастар организатор семӹнят ӹшкӹмжӹм анжыктен, ӹшке йӹржӹ шукы талантан анзыкылашы мары писательвлӓм цымырен дӓ кушкаш палшен.

       Тӹдӹн кид лӹвецӹнжӹ мары литературышты пӹтӓришӹ «Вурс мардеж» роман (1930-1931 ивлӓн), тенгеок «Савик» (1933 ин), «Туан сӓндӓлӹк» (1935 ин) романвлӓ, «Комсомол ӹдӹр» (1933 ин) повесть дӓ эче молы шукы шайыштмашвлӓ, очерквлӓ дӓ лыдышвлӓ лӓктӹнӹт.

       Н.В. Игнатьевӹн ӹлӹмӓш дӓ творческий корныжы доно келгӹнрӓк пӓлемдӓш манын, музейын пӓшӓзӹвлӓ толшывлӓлӓн «Лӹмжӹ доно когоэшненӓ» видеопрезентацим йӓмдӹленӹт дӓ  анжыктенӹт.

      Программы семӹнь, тене инсценировкывлӓн конкурсым эртӓрӓш пӓлемдӹмӹ. Жюришкӹ Е.Г. Кашутинам – Н. Игнатьев лӹмӓн краеведческий музейӹн вуйлатышыжым, Р.Н. Салдаевам – Кырык мары образовани отделын методистшӹм, Л.А.Митрюшкинам – Н. Игнатьев лӹмӓн районын тӹнг библиотекын краеведческий отделын вуйлатышым айырымы. Ӹшке мастарлыкыштым анжыкташ Картук тӹнгӓлтӹш, Йоласал, Эмӓнсола, Пайыскырык кӹдӓлӓш школын тыменьшӹвлӓ дӓ нӹнӹн тымдышывлӓштӹ постарненӹт.

     «Савик» роман, «Комсомол ӹдӹр» повесть, «Кужы ӱпӓнӹн – кужы ыш» пьеса, «Ялахай Йогор» шайыштмаш гӹц лаштыквлӓм тыменьшӹвлӓ артиствлӓ семӹньок масакланен мадын анжыктевӹ. Жюри тошты мары выргемӹм шот дон, итӹрӓн чимӹм, произведенивлӓм самынялтдеок шайыштмыштым, мадын мыштымыштым ӓкленӹт. Иктешлӹмӹ паштек, 1-4 классвлӓ лошты сӹнгӹшеш Картук тӹнгӓлтӹш школын тыменьшӹвлӓ, 5-9 классвлӓ лошты икшӹ вӓрӹш – Йоласал дӓ Эмӓнсола кӹдӓлӓш школвлӓн, кокшыш – Пайыскырык кӹдӓлӓш школын тыменьшӹвлӓ лӓктӹнӹт.

     Н. В. Игнатьев кӹтӹк жеп веле ӹлен, пӓшӓлен  гӹнят, кырык мары литературышты кого пӓлӹкӹм коден. Седӹндон, мӓ, сӓмӹрӹквлӓ, тӹдӹм дӓ сирен кодымыжым шотеш пиштӹшӓшлык ылына. Тидӹжы тагачшы вӓшлимӓшӹшты рашт кайы.

©2013. Все права защищены.