Увервлӓ

Кырык сирӹштӹ «Алые паруса»

    27-шы июньын Кырык сирӹштӹ сӓмӹрӹквлӓн айо кечӹ веселӓн эртен.

   Айо программышты футбол, олимпийский мильыш кыргыжмаш да вес тӓнгӓшӹмӓшвлӓӓт ылыныт. 6 цӓш вады якте сӓмӹрӹквлӓ ӹшке ви доно тӓнгӓшенӹт, а варажы нӹнӹм кымылангдымы веселӓ мероприятийвлӓ эртӓрӓлтӹнӹт, кыштакен Кырык мары районыштыш 2015 иӓш выпускниквлӓлӓн «Алые паруса» лӹмӓн шоу-программы айыртемӓлтӹн. Тӹдӹ айон салымжы ылын. 

   Торжественный частьым Кырык мары район вуйлатышы А.В.Гурьянов пачын. Цилӓ сӓмӹрӹкӹм айо кечӹ доно кымылангден. Кырык мары район администрацим вуйлатышы В.С.Сеюшовын вӓшлимы шамаквлӓм йонгалтарен. Е.В.Смелов, кырык мары муниципальный район администрацин вуйлатышым социальный ядмашвлӓ доно вашталтышы, пуры шамаквлӓм тенгеок келесен дӓ 2011-2015 иӓш «Жилье для молодой семьи» программы семынь 1млн. 25 тӹжем тӓнгӓэш сертификатым сӓмӹрӹк семнялӓн кычыктен. Тене техень цӓш Малиновкы солашты ӹлӹшӹ Яшмолкинвлӓлӓн вӓрештӹн. Тенгеок 2 семня айо кечӹн ӓвӓ капитал сертификатым кидӹш нӓлӹнӹт.

  Кырык мары районын спортивный секторым вуйлатышы В.В.Семенов, сӓмӹрӹквлӓн отделым вуйлатышы А.А.Шаронов, Кырык мары районын культура отделым вуйлатышы Л.А.Атласкина сӓмӹрӹквлӓм мактевӹ. Сек спортвный, сек мастар дӓ  сек активныйвлӓ грамотывлӓ, тау шамаквлӓ доно пайдаралтыныт.

   Футболла мадмашты 1вӓрӹм Виловат сола команды нӓлӹн, кокшывлӓ Кулаковывлӓ линӹт, кымшы вӓрӹм иквӓреш ушнышы Микрӓк дӓ Эмӓн сола халыкын «Сумка» команды нӓлӹн. 1600 метрӓн «Олипийский миля» дистанцим 3 иӓшӓн категори доно ӓклӹмӹ. Кыргыжмашты Микушкин Юрий абсолютный чемпион лин. Тыменьшӹвлӓ лошты 1в. - Шестаков Даниил, 2в. – Родионов Павел, 3в. – Зайцев Даниил. Сӓмӹрӹквлӓ лошты 1в. – Ашпатров Николай, 2в. – Моляров Кирилл. Когорак иӓшӓнвлӓ лошты 1в. – Микушов Юрий, 2в. – Комаров Роман, 3в. – Архипов Александр. Цилӓ сӹнгӹшӹ спортсменвлӓм медальвлӓ, грамотывлӓ доно сусуэмдӹмӹ.

    Клубвлӓн централизованный системын, образовании отделын шытыр доно тене сӓмӹрӹквлӓн кечым школ гӹц ыжатымы кечӹ доно кӹлдӹмӹ. Ти кечӹн районнан кӹдӓлӓш школвлӓштӹ Выпускной вадывлӓ эртӓрӓлтӹнӹт. Дӓ тенге айырымы жепеш цила выпускник Виловатыш погыненыт.

    Виловат Культура тома анзылны сӓмӹрӹквлӓм анзыкыла ӱжшӹ Якшар парус выльгыжалтын. Техеньӹм мӓмнӓн халык молнам телевизырышты веле ужын, а кӹзӹт тыды лачокшылаок кайын, вуйта сирӹш лӓктӹн, «Виловатый варяг» (тенге тӹдӹм лӹмденӹт) сӓмӹрӹквлӓлӓн цӓшӓн корным ажедӹн.

    Айо жеп кемӹ семӹнь изион-олен кӹдӓлӓш школвлӓ гӹцӹн выпускниквлӓ Якшар парус докы погыненӹт. Сек пытари Красноволжский школын выпускниквлӓ кым йиш цӹреӓн триколор лентавлӓ доно айош толыныт, паштекӹштӹ - Пайскырыквлӓ, Пӹзӹкнырвлӓ, Эмӓн, Виловат, Йоласал школвлӓн выпускниквлӓӓт цымыргенӹт. Цилӓнӓт нӓрӓтӓн костюмвлӓ доно, выпускниквлӓн лентавлӓ доно айошты ылыныт. Нӹнӹм анженжӓт темӓш лиде.

   Кырык мары район образовани отделым вуйлатышы Тораев Н.Н. сусу кымыл доно ӹшке тыменьшӹвлӓжӹм у ӹлӹмӓшӹш ыжатыш.  2014-2015 тыменьмӹ иӓш иктешлӹмӓш семынь, районнан школвлӓштӹ 11 выпускник-медалист. Виловат кӹдӓлӓш школ гӹцӹн Казаков Максим Олегович, Кузьмина Дария Андреевна, Спирков Иван Иванович да Храмов Вениамин Александрович; Красноволжский школ гӹц Корнилова Татьяна Олеговна, Михеева Ольга Владимировна, Портнова Татьяна Александровна, Скворцова Мария Юрьевна; Пайскырык школ гӹцӹн Гаврилова Анастасия Александровна, Горбунова Наталья Сергеевна да Григорьев Андрей Тарьянович. Цилӓштӹлӓн образовани отделым вуйлатышы, традици семӹнь, зонтиквлам подарен: «Тек ӹлӹмӓшдӓ цӓшӓн лиэш, худавлӓ гӹцӹн соок ытаралт шалгыда», Мары Кугижӓнӹш университет ректорын кымылангдымы шамаквлам йонгалтарен, дӓ цилӓ медалистлӓн пакыла тыменяш кемӹ сертификатвлӓм кычыктен. Лӹмеш, Пайскырык кӹдӓлӓш школын медалист Григорьев Андрейым Мары Кугижӓнӹш Университетышты тыменяш путевкы доно пайдарен.

   Районнан сӓмӹрӹквлӓн отделым да культура отделым вуйлатышывлӓ тенгеок анзыл вӓрӹштӹ ылшы выпускниквлӓм кымылангденыт.  Л.А. Атласкина культура отдел лӹм доно Д. Изиковалан, Д. Кузьминалан,  М. Кольцовалан грамотывлӓм кычыктен, тау шамаквлӓм Батыгина М., Ванюкова В., Фадеева А., Капитонова А., Саватеева А., Соколова М., Изоков С. нӓлӹнӹт. Сӓмӹрӹквлӓн отделым вуйлатышы А.А.Шаронов тау шамаквлӓ доно Пӹзӹкныр школын выпускниквлӓм (Юринова Надежда, Ишалева Татьяна), Пайскырык школын выпускниквлӓм (Черашова Мария, Казакова Татьяна, Князева Наталья, Атялакова Эльвира, Васикова Ирина), Йоласал школ гыц Овчинникова Анастасиям кымылангден.

   Централизованный клубный системын вуйлатышы Кубеков Леонид Зиновьевич пуры шамаклӓ доно сӓмӹрӹквлӓм мактен. «За активное участие» манын, сӓмӹрӹк ӹдӹр-ӹрвезӹвлӹлӹн грамотывлам кычыктен. Вет и мычкы районан культура сферышты шукы йиш мероприятийвлӓ эртӓрӓлтӹт. Нӹнӹн сек активный участниквлӓжӹ сӓмӹрӹквлӓ ылыт. Пайскырык школ гӹц Васикова Ирина, Кириллов Константин, Казакова Татьяна, Поствайкин Кирилл, Князева Наталья, Атялакова Эльвира, Эмӓн гӹц Куприяшкина Анна, Лукьянов Сергей, Малов Александр, Усола гӹц Суворова Алина, Семенова Татьяна, Тихомирова Татьяна, Микрӓк школ гӹц Акоскина Валентина, Кулаковы гӹц Алгасов Альберт, Йоласал гыц Романов Игорь.

  Кечӹ валымы семӹнь айо когоракын рӹшкӓлтӹн. Кырык мары эстрадын шӹдӹрвлӓ цилӓмок веселӓйӹктенӹт. Ти жепеш айош толшывлӓжӓт шамде шукын ылыныт. 

   Видӹшӹвлӓ Кристина Ильинова да Николай Кубеков мыштен халыкым цымыренӹт. Нӹнӹн пуры, кымыл лӱктӹшӹ шамаквлӓштӹ доно айожат веселӓрӓк лин. Массовый флешмоб цила сӓмӹрӹкӹмок иквӓреш ушен. Тӹштӹ сек активныйвлӓ Пайскырыквлӓ линӹт. Пӹтӓри школьный вальсым, вара шукы йиш семеш да тенгеок кырыкмарла куштымашым «Виловатый варяг» Алый парусышты пишок сӹлнӹн анжыктенӹт. А йӹрвӓш ылшы халык сагашты куштен. Теве балын король да королевам айыраш жеп шон. Цилӓнӓт тиштӹ участвуен кердыныт. Айош толшы халык айырымы семынь 2 мыжыр шукырак юкым нӓлӹн. Ик мыжыржы - Виловат школын выпускниквлӓ Дарья Кузьмина да Вениамин Храмов, коктынат - 2015 иӓш медалиствлӓ, вес мыжыр Красноволжский школ гыц Татьяна Портнова (медалист) да Максим Смирнов («Мӹнь хорошист ылам», - маньы). Мыжырвлӓ ӹшке лоштышты «Алый парус» лӹмӓн тӓнгӓшӹмӓшӹм эртенӹт. Сӹнгӹшеш Красноволжский школ гӹц выпускниквлӓ лӓктӹнӹт. Татьяна доно Максимлан коронывлӓм чиктенӹт да школьный вальсыш ӱжӹнӹт.

   Ӓкӓк-шоляк Ирина да Илья Юшкинвлӓ «Алые паруса» мырым йонгалтаренӹт, нӹнӹн мыры семеш халыкын мырымы юк Кырык сир мыч рӹшкӓлтӹн. Айо салют, дискотекы пакыла халыкын кымылым лӱктенӹт.

  Кӱ ти кечӹн Виловатышты ылын, цилӓнӓт ӹвӹртенӹт. Сӓмӹрӹквлӓн айо келшен толын. Шӱм гӹц лӓкшӹ пуры шамакым цетрализованный клубный системышты пӓшӓлӹшӹвлӓлӓн лӹмӹнок келесенӹт. Вет халыкым погаш веле агыл, а кӓнӹмӹ вӓржӹмӓт мыштен цеверемдӓш келеш. Ти шотышты кого пӓшӓм Виловат культура томан пӓшӓзӹвлӓ икышын видӓт. Седӹндонок, пӓшӓм ӓклен, В.А.Гурьянов тау шамакым Виловат культура томан вуйлатышы В.М.Кубековлан кычыктен. А выпускниквлӓлӓн техень кого айом, лӹмӹнок якшар парусым ӹштӓш шанымашым Л.З.Кубеков пуэн. Тӹдӹн ӹшке участи доно, культурышты пӓшӓлӹшӹвлӓн шытыр доно Алый парус Кырык сирышты шачын.   Шаненӓ, айовла тишты эче шукын эртат лиэш. А вес сола поселенивлӓн халыклан шаналташ кодеш, ак ли ма ӹшке культура тома лишнӹ халыклан кӓнӓш цевер вӓрӹм айыраш дӓ, соты вим пиштен, цеверемдӓш.

   А кӹзӹт Кырык сирӹштӹш Якшар парусна сӓмӹрӹк ӹдӹр-ӹрвезӹвлӓм у корнышкы ӱжеш. Тек ӹлӹмӹ корнышты тӧр, такыр да цӓшӓн, семеш ӹфӹлӹшӹ мардежӓн да валгалтшы соты пӹлгоман лиэш.

С.К. Еронова

©2013. Все права защищены.