Увервлӓ

КӒНГӸЖӸМ ВӒШЛИМӒШ.

        Кӓнгӹж – сек сӹлнӹ жеп. Йӹрвӓш ыжаргы, кечӹ шокшын ӹрӹктӓ, цевер гӹц цевер чиӓ цӹре доно пеледӹшвлӓ пеледӹт, шуды лошты мӧрвлӓ кӱн шӹнзӹнӹт, кеквлӓн мырымы юк йӹрвӓш рӹшкӓлтеш. Тетявлӓлӓнжӹ гӹнь, кӓнгӹж айыртемӹнок шукы сусум канда, вет нӹнӹн кӓнӹмӹ, мадмы жеп толын.

        Июнь тӹлзӹн ик аяран кечӹжӹн, йӹр ылшы солавлӓштӹшӹ изи тетявлӓ Н. Игнатьев лӹмӓн Краеведческий музейӹш кӓнгӹжӹм вӓшлиӓш постарневӹ. Кыды-тидӹжӹ кӓнгӹж гачеш тьоти-папивлӓштӹ докы хыналаш толыныт, а шукынжы Салымсолашты ӹлӹшӹ ӹдӹр-ӹрвезӹвлӓ. Музейӹн пӓшӓзӹвлӓ тетявлӓм шукы йиш мадышла мадыктенӹт: «Кечӹм рисуйы», «Пӹсӹ поезд», «Живой мяч», «Лӹмӹм пӓлӹ» дӓ молат. Потикӓлӓ эстафетывлӓ, обруч доно мадмаш пиш шукы сусум кандевӹ. Ышым пыдырталаш манын, пӱлӓ тыштывлӓм кӓнгӹж гишӓн тыштымы, шокшы тӹлзӹвлӓ гишӓн халык пӓлӹвлӓмӓт пӓлемдӹшнӓ. «Ӱштӹ Кугуза дон кӓнгӹж» лымӓн мультфильмым ӹвӹртен анжевӹ, вет Кугуза пиш кӓнгӹжӹм ужнежӹ ылын, тетявлӓн палшымы доно шанымашыжы шокталтын.

        Овуца семӹньок, иквӓреш стӧл йӹр шӹнзӹн, шокшы чӓйӹм йун дӓ канфетӹм качкын вӓшлимӓшнӓм кашартышна.

        Анзыкылаат музейӹштӹ эртӓрӓлтшӹ мероприятивлӓш улы кымылын цилӓдӓм ӱжӹнӓ.

      

©2013. Все права защищены.