Увервлӓ

«ЦЕВЕР ӸДӸРӒМӒШВЛӒЛӒН!»

 

          Пеледӹшвлӓ, ӓршӓшвлӓ,

          Нӓрӓштӓ ӹдӹрӓмӓшвлӓ.

          Ласко гӹц ласко шая –

          Тагачы айом айат…

                    В. Петухов. Айо годым.

          Шошымшы айо ӹдӹрӓмӓшӹм, яратымашым, йишӹм иктӹш уша дӓ ик кого празньыкыш сӓрнӓлтеш. Кӹзӹт Ӹдӹрӓмӓшвлӓн празньык 8 мартын пӓлемдӓлтеш. Ти празньыкынат ӹшке историжӹ улы. Эче XIX-шӹ  курымынок, 8 мартын 1857 ин? Нью-Йоркышты швейный дӓ обувной фабрикышты ровотайышывлӓн манифест эртен. Ӹдӹрӓмӓшвлӓ тӹнӓм 16 чӓс вӓреш 10 чӓс ровотайыман кечӹм дӓ пӱэргӹвлӓн ганьок пӓшӓдӓрӹм тергенӹт. Тишец вара ӹдӹрӓмӓшвлӓ избирательный правам получаенӹт дӓ профсоюзвлӓ ровотаяш тӹнгӓлӹнӹт. 1910 ин Копенгагенӹштӹ Международный ӹдӹрӓмӓшвлӓн конференциштӹ революционерка Клара Цеткин Всемирный ӹдӹрӓмӓш кечӹм 8 мартын пӓлемдӓш ӱжӹн. Российӹштӹ пӹтӓри ти празньыкым 1913 ин Петербургышты пӓлемденӹт. А 1976 ин Международный ӹдӹрӓмӓш кечӹм официально утверждайымы.

          Ти айом пӓлемдӓш, ик шошымшы аяран кечӹн, пашкуды солавлӓштӹ ӹлӹшӹ ӹдӹрӓмӓшвлӓ, Н.Игнатьев лӹмӓн краеведческий музейӹш постарненӹт. Музей пӓшӓзӹвлӓ пиш паян дӓ интересный сценарим йӓмдӹленӹт, а ӹдӹрӓмӓшвлӓм, ӓвӓвлӓм кымылангдаш Россий Федерацин дӓ Мары Эл Республикын культурын заслуженный пӓшӓзӹжӹ А.А. Яйцов лӹмӹн толын. Овуца семӹнь, вӓшлимӓшнӓм первишӹ «Салым сола вуйыштет» мыры доно тӹнгӓлнӓ. Ӹшке мастарлыкыштым хынавлӓнӓ сакой йиш конкурсвлӓштӹ дӓ мадмашвлӓштӹ анжыктевӹ: «Ыш ядмашвлӓ», «Ӹдӹрӓмӓш лӹм», «Качкышым ӓшӹндӓрӹ», «Шамакдеок ынгылы» дӓ молат. Гармонь юк семеш йӓнг вашт кушталтышна, тошты кырык мары мыры виквлӓӓт ӓштӓлтевӹ, кыды-тидӹжӹн сӹнзӓвлӓштӓт вӹдӹжгевӹ. Айона пиш яжон, веселӓн эртӹш. Хынавлӓ музей пӓшӓзӹвлӓлӓн шокшы таум келесевӹ дӓ анзыкыжымат техень пуры вӓшлимӓшвлӓм эртӓрӓш согоньлевӹ.

©2013. Все права защищены.