Увервлӓ

Церотан концерт

7 февральын  Эмӓн сола культура томашты Эмӓн вел халык «Туан солана мыра» район фестивалышты ӹшке мастарлыкыштым анжыктенӹт.

Концертӹм «Мать Россия моя» мыры доно хор тӹнгӓлӹн. Программышты «Шанавӹл», «Йӹрӓлтӹш», «Сударушки», «Манжерок» вокальный ансамбльвлӓ дӓ кӓрш ансамбль «Нӹжгӓ сем» участвуеныт.

Тенгеок И.Ихонькина, М.Малова, Вика Ефимова, Василий Москалев, Сергей Огнёв, Настя Бычкова, Арсений Яйцов мырывлӓм йонгалтареныт. Василий Москлёв «Йӹрӓлтӹш дон аздаренӓт» дӓ «Шачмы вӓрем» ӹшке мырывлӓжӹм мыралтен.

Куштышы коллективвлӓ веселӓ куштымашвлӓм анжыктенӹт. Нӹнӹ лошты тетявлӓн ансамбльвлӓ «Веселӓ тӓнгвлӓ», «Веселушки», когорак куштышы ансамбль «Веселӓ пелӓшвлӓ» кырык марла куштен пуэвӹ.

Тетявлӓн  фольклорный коллектив «Изи шанавӹл» фольклорный картинӹм «Ӱӓрням» анжыктеныт, а «Шанавӹл»  - «Тошты фото» картиным.

Залышты шӹнзӹшӹ халык «Оролын омынжы» масакла картиным сусунок вӓшлин, кыдым Микрӓк потребобществын пӓшӓзӹвлӓ анжыктенӹт.

Тенгеок клубын фойештӹ кид мастарвлӓн яжо выставкым ӹштӹмӹ. Тиштӹ тымдышывлӓн, тыменьшӹвлӓн, садикштыш пӓшӓзӹвлӓн дӓ сола халыкын кид пӓшӓвлӓштӹм анжыктымы.

Пуры тел вады пиш яжон эртен дӓ сола халыклан шукы жепеш ӓшӹндӓрӓш кодын.

   

 

 

©2013. Все права защищены.