Увервлӓ

Амельченко лӹмеш видеофестиваль

     27 январьын Йоласал культура пӧртышты Россия Федерацин да Мары АССР-ын культурын заслуженный пӓшӓзӹжӹ, Олык Ипай лӹмеш сӓмӹрӹквлӓн Государственный премин лауреат, Кырык сирӹштӹ кымдан пӓлӹмӹ кинорежиссёр Анатолий  Дмитриевич Амельченкон шачмыжылан 75 и шомы лӹмеш любительский видефильмвлӓн пӹтӓриш районный фестиваль эртен. Анатолий Дмитриевич Амельченко кымдан пӓлӹмӹ кинорежиссёр, «Юнга-фильм» киностудим ӹштӹшӹжӹ. 20-30 и перви тӹдӹн фильмвлӓм анжаш халык пишок яратен. Анатолий Дмитриевичын ӹлӹмӓшӹжӹ Йоласал лишнӹ Йынгы Кушыргы солаэш эртен. Тӹдӹ ӹшке Кырык сиржӹм, халыкшым яратен снимаен. Фестивальын лӹмжӹмӓт «Яратем тӹньӹм, туан мӱлӓндем!» манмы.

      Фестивальын тӹнг цельжы – районыштыш культура ӹлӹмӓшӹм шукырак сӹнӓнӹм ӹштӓш, виделюбительвлӓлӓн анзыкыла вӓшлиӓлтӓш дӓ ӹшке творчествыштым виӓнгдӓш  вӓрӹм пачаш. Кӹзӹтшӹ ӹлӹмӓшӹштӹ шукынок кидӹштӹ фотоаппарат да видекамера улы. Видеолюбительвлӓлӓн ти фестиваль - кӓнгӓшӹмӹ йӧн лишӓшлык.

      Фестиваль тӹнгӓлмӹ анзыц А.Д. Амельченкон киновлӓжым клуб циц погынышы халык ӹвӹртен анжен. Сӓмӹрӹк анжышывлӓлӓн тошты кадырвлӓ гач  Кырык сирӹштӹш первиш ӹлӹмӓш пачылт миэн.

      Цилӓжӹ жюри 22  пӓшӓм ӓклен. Видеолюбительвлӓ шукы йиш номинацишты кӓнгӓшенӹт. Нӹнӹ лошты сӹнгӹшӹвлӓӓт линӹт: Илья Романов «Предварительная учёба» фильм дон, Лев Гусев «Колхозный театр» познавательный фильм дон, Диана Еруханова «Родные просторы» слайд-шоу дон,  Татьяна Портнова «С Днем учителя!» игровой фильм дон. Тидӹ гӹц пасна эче фотографивлӓн выставка лин, кышты сӹнгӹшеш Йоласалышты тыменьшы Тятюкова Валерия лӓктӹн. Сӹнгӹшӹвлӓлӓн дипломым дӓ кубокым пумы.

      Тенгеок халык Я.Эшпай лӹмеш дворецышты ӹштӹмӹ яжо клипвлӓм анжен. Ти клипвлӓн авторжы видеооператор Сергей Петухов ылеш.

      Пӹтӓриш фестиваль эртен. Жюри да халык тӹдӹм кӱкшӹн ӓкленӹт. Жюрин пӓшӓвлӓ док согоньвлӓӓт ылыныт, кыцерӓк видеокамерым кидӹштӹ кычымыла, махань сюжетым ӹштӹмлӓ ынгылдареныт. Вес иэшӓт Йоласалышток январь тӹлзӹн угӹц техень фестивальок эртӓрӹмӹ лиэш.

Культура отделын методист Т. Петрова

©2013. Все права защищены.