Увервлӓ

«Ӹлӓш, паштек кишӓм кодаш».

     Январь тӹлзӹн Кырык мары районын ик лӹмлӹ краевед, тымдышы, Мары Эл образованин заслуженный пӓшӓзӹ Виссарион Зиновьевич Фадеевын шачмыжылан 65 и темшӓшлык ыльы.

     Виссарион Зиновьевич ӹлӹмӹжӹ годымок пишок кымдан пӓлӹмӹ, лӹмлӹ эдем ылын.

     Виловат солан библиотекарьвлӓ школыштыш тетявлӓ доно «Тымдышы дӓ краевед» лӹмӓн мероприятим эртӓренӹт. Сӓмӹрӹк ӹрвезӹ-ӹдӹрвлӓ техень лӹмлӹ эдемвлӓ гишӓн пӓлӹшышлык ылыт.

     Виловат библиотекын заведуйышыжы Зинаида Петровна Васильева сек пӹтӓриок Виссарион Зиновьевичын ӹлӹмӓш корныжы доно пӓлӹмӹм ӹштен. Тетявлӓ экранышты анжыктымы презентацишты тӹдӹн ӓтяжӹм, ӓвӓжӹм, наградывлӓжым, ӹшкӹмжӹмӓт ужыныт.

     Тенгеок Зинаида Петровна Паратмар дӓ Виловат школышты Виссарион Зиновьевичын тымдымыжы гишӓн ӹшке ӓшӹндӓрӹмӓшӹжӹм шайышт пуш.

     Виссарион Зиновьевич занятивлӓштӹ тымдымы шукы йиш форма дон методым мыштен кычылтын. Тидӹм тетявлӓ экранышты ужын кердӹнӹт. Нӹнӹлӓн Виссарион Зиновьевич 1996 ин историй дон виш урокым пумы лаштыкым анжыктымы. Виловат культуры пӧртӹштӹ концертым мастарын видӹмӹжӹмӓт ужевӹ.

     Тыменьшӹвлӓ тенгеок В. З. Фадеевын внештатный корреспондент, фотограф, коллекционер, художественный самодеятельностьышты участвуйымыжы, «Веселӓ тӓнгвлӓ» ансамбльышты мырымы гишӓнӓт пӓлен нӓлевӹ.

     1994 ин «Веселӓ тӓнгвлӓ» ансамбль мыры конкурсышты участвуен. Ти номерым тетявлӓ экранышты анжевӹ.

     Пакыла Зинаида Петровна Виссарион Зиновьевичын тетявлӓм яратымыжы гишӓн, нӹнӹм ӹшке йӹржӹ цымырен мыштымыжы гишӓн пӓлемдӹш. Такеш агыл тӹдӹн вуйлатымы краеведческий да туристический кружокышкы каштшы тыменьшӹвлӓ сагажы районын цилӓ исторический вӓрвлӓшкӹжӹ миэн шоныт.

     Презентациштӹ вара Виссарион Зиновьевичын пецӓтлен лыкмы книгӓвлӓжӹ дон пӓлӹмӹ линӓ. Республикышты да Всероссийский конкурсвлӓшты В. Фадеев книгӓвлӓжы дон участвуен да дипломвлӓ доно пӓлемдӹмы лин.

     Мероприятиштӹна Виссарион Зиновьевичын ӹдӹржӹ Светлана Виссарионовна ылын, тӹдӹ  Виловат школышты тымда.

     Зинаида Петровна тӹдӹлӓн Виловат библиотекышты лыкмы «В. З. Фадеев – историк-краевед» библиографический пособим да «Учитель, краевед, Мары Эл образованин заслуженный пӓшӓзӹжӹ В. З. Фадеевын шачмыжылан 65 и» буклетым кычыктен.

    В.З. Фадеев лыдышвлӓмӓт сирен. «Тыменьшӹн мырыжы» лыдышыжы Виловат кӹдӓлӓш школын гимнжы лин.

     «Техень эдем мӓ лоштына ӹлен, труен» шамаквлӓ доно вӓшлимӓшнӓм мычашкы шоктышна.

 

                                 Виловат сола библиотекын заведующий Васильева З. П.

©2013. Все права защищены.