Увервлӓ

Ӓвӓ – кечӹ доно иктӹ

     Ӓвӓ! Мӱлӓндӹ вӹлнӹ сек шергӓкӓн эдем. Сек пуры, сек яжо, сек лишӹл. Эче шукы сӹлнӹ шамакым ӓвӓ гишӓн попаш лиэш. Ӓвӓ – ӹлӹмӓшӹн тӹнг, ӹлӹмӓш корнын тӹнгӓлтӹшӹжӹ. Такеш агыл Ӹдӹрӓмӓш праздникшӓт пӹтӓриш шошымшы тӹлзеш толеш, кынам цилӓ мӱлӓндӹ телшы ом гӹц понгыжалтеш, ӹлӹжеш, у ӹлӹмӓшӹш йамдӹлӓлтеш.

     Ти праздник кечӹн цилӓн талашат кымылангдаш ӹшке ӓвӓштӹм, папиштӹм, ӹдӹрӹштӹм.

     Мӓмнӓн Усола библиотекынаат ти кечӹм каждый ин пӓлемдӓ. Тене, 6 мартын, Усола школын 4-шӹ классыштыш тыменьшӹвлӓ доно  «Весенний калейдоскоп» мероприятим эртӓреннӓ. Ти классышты тыменьшӹвлӓ книгӓм лыдаш яратат, библиотекышты вӓрлӓнӹшӹ «Книголюб» клубыш ӹшке тымдышышты Яковлева Наталия Алексеевна доно  каштыт. Праздникӹш тетявлӓ  ӓви доно папивлӓм шӱденӹт. Нӹнӹлӓн шукы йиш мырым мыренӹт, лыдышвлӹм яжон шайыштыныт, а ӓвивлӓ дӓ папивлӓ йӹвӹрт сӹнзӓвӹдӹм ӹштӹлӹнӹт. Айошты сакой йиш конкурсым эртӓрӹмӹ: шошымшы пеледӹшвлӓ гӹц ӓршӓшӹм погаш; анжыдеок шӹрӓшвлӓм пӓлӓш; халык шаявлӓм ӓшӹндӓрӓш; ямаквлӓ гӹц  персонажвлӓм пӓлӓш; ӹшкӹмӹм артистлӓ виден мӹштӓш дӓ молат. Конкурсвлӓштӹ тетявлӓ сага ӓвӓвлӓӓт участвуенӹт. Веселӓйӹмӓштӹ жеп пиш чӹнь эртен кеен. Остаткаэш  тыменьшӹвлӓ  ӓвивлӓлӓн йӓмдӹлӹмӹ подаркавлӓштӹм подаренӹт, кыдылан нӹнӹ пиш сусу линӹт дӓ таум келесенӹт.

 

Ӓвилӓн

  

Ӓви!

Сек пӹтӓриш шамак,

Сек туан дӓ лишӹл.

Тӹнь гишӓнет ӓштен

Мӹньӹн куза кымыл.

Ӓви!

Кечӹ доно иктӹ

Ӹлӓт тетялӓнет!

Мӓмнӓм со ӹрӹктӓ

Тӹньӹн пуры йӓнгет.

Ӓви!

Сек шергӓкӓн эдем

Ылат Земля вӹлнӹ!

Тӹньӹн шытыретӹм

Курым мычкем мактем!

 

                                                  Алатайкина Г.В., заведующая Усолинской библиотекой.

  

©2013. Все права защищены.