Увервлӓ

Туан солана мыра

   

     24 февральын Эмäн сола клубышты «Туан солана мыра» концерт вады эртен. Анжаш толшывлä пӹтäриок пырымыкышты фотовыставкым ужыныт, кыдым Отечествым  перегӹшӹвлäн кечӹ лӹмеш ӹштӹмӹ ылын. Эмäн кымдемӹн пӱэргӹвлä ӹшке армийышты служымы пора годшы фотокарточкывлäм ужын кердӹнӹт.

     Пакыла эртӹмӹкӹ хынавлäм "Эман вел мастарвлӓн кид пäшäвлäштӹ" выставкы кымылангден. Лӹмӹнок таум келесӹмӹ Наталья Герасимовалан, Сергей Савельевлан, Ангелина Яковлевалан, Станислав Лукиановлан, Галина Тимофеевалан, Римма Сидоровалан, Алевтина Матруковалан, Людмила дä Елена Саличкинавлäлäн, Альбина Сидоровалан, "Дюймовочка" тетя садышты пäшäлӹшӹвлäлäн дä Эмäн клубын "Рукодельница" кружоклан. Нӹнӹн кидпäшäвлäштӹ и гӹц иш выставкынам олмыктарат. Тенгеок таум келесенä Светлана Симолкиналан ("Рукодельница" кружокын вуйлатышы) кыды ӹшкеäт кидпäшäвлäжӹм канден дä выставкым оформляйен.

     Залыш пырымыкы экранышты Эмäн культура томан дӓ Сарапай халык овуцавлäн культура томан эртӹш 2016-2017 ивлäн пäшäлӹмӹ гишäн ӹштӹмӹ видеопрезентацийвлäм концерт якте анжыктымы.

     Куд цäш вадеш айо вады тӹнгäлäлтӹн. Пӹтäриок цевер ӹдӹрвлä кырык мары семвлäм кäрш доно йонгалтаревӹ. Анжаш толшывлä тетя садыш кашшывлä, тымдышывлäн "Йӹрäлтӹш", куштышы "Веселä пелäшвлä", гитары доно мырышы "Серебряные струны", тымдышывлäн куштышы "Нежность" ансамбльвлäм сусун вäшлиэвӹ. Игорь Погудинӹн "Дети войны" мырыжым сӹнзäвӹдде анжаш ӹш ли. "Младенец Иисус" мыры доно Антропова Лида кымылым лӱктӹш. Зал хäлä пиш шокшын лапавлäм Дмитрий дä Мария Конаковвлäлäн шиэвӹ. Сарапай  халык фольклор ансамбль «Шанавӹл» «Салтак ыжатымаш» фольклорный картинӹм анжыктен. Вуйлатышыжы Галина Суворова. Ти картин доно "Культурное наследие" районыштыш фестиваль-конкурсышты Гран-прим сӹнген нäлӹн. Ирина Тимакова, Зинаида Милюкова, Нина Петрова, Иван Емельянов, Майя Малова дä Аня Смирнова мырывлä доно халыкым ӹвӹртäренӹт. Когонок потикä "Кым кесӹ"масакланымашым Любовь Куприяшкина, Ираида Ихонькина, Зинаида Милюкова дä Арсений Яйцов анжыктеныт. Остаткаэш Эмäн сола поселенин 70 нäрӹ художественный самодеятельностьын участниквлäжӹ хор доно концертӹм пӹтäревӹ. Цилä артистлäн кого таум келесенä дä анзыкылаат клубышкына мыраш-кушташ ӱжӹнä.

     Сценарий семынь видӹшӹвлä концерт мыч кином снимайышы группа толма-шеш сола ӹлӹмäш гишäн материалым йäмдӹленӹт. Волонтервлäн и манмым, 2020-шы ин Мары Эл Республикы 100 иäш лӹмгечӹжӹм пäлдӹртӹмӹм, "Десятилетие детства" тӹнгäлмӹм дä солаштыш яжо ӹлӹмäш темывлäм тäрвäтӹмӹ. Цилä номер ӹшке лоштышты кӹлдäлтмӹ ылыныт. Концертӹм видäш Андрей Шаронов шукы и мäлäннä палша, тӹдӹлäн кого таум келесенä.

     Айо вады ик шӱлӹш доно эртен кеш. Анзыкыла тäмдäмäт, газетым лыдшывлäм, Эмäн культура томаш концертвлäш ӱжӹнä.

 

Наталья Сидорова, Эман культура томан культорганизатор.

  

©2013. Все права защищены.