Увервлӓ

Писатель дӓ поэт И.Горный

 

     Кырык мары кымдемнӓ шукы писатель дӓ поэт доно лӹмлӹ ылеш. Нӹнӹ логыц иктӹжӹ Иван Горный (Тарьянов Иван Иванович). Тӹдӹ 1933 ин 23 февральын Алыктыр (Саратеево) сола хресӓнь семняэш шачын. Вӹдсӹнзайӓл тӹнгӓлтӹш школым, вара Усола кӹдӓлӓш школым тымень лӓктӹн. Москваштышы журналистикын Всесоюзный кокиӓш лекторим дӓ КПСС ЦК сагашы Высший партийный школын печать отделеним пӹтӓрен. 1951-1954 ивлӓн Козьмодемьянскыштышы издательствын корректор ылын. Кым и утла армиштӹ служен дӓ тӹдӹн паштек 31 и «Ленин корны» районный газет редакциштӹ пӓшӓм ӹштен: отделым вуйлатышы, редакторын заместитель, 1970-1989 ивлӓн редактор ылын. 1960-1989 ивлӓн Иван Горный кырык мары литературный ушемӹм вуйлатен, и йӹде лӓкшӹ «Кырык Сирӹштӹ, Йыл тӹрӹштӹ» коллективный сборниквлӓм йӓмдӹлен шалген, тенге сӓмӹрӹк авторвлӓм кушташ палшен. Тӹ жепӹнок Йошкар-Олаштышы мары писательвлӓн Союз правлении председательӹн заместителеш айыренӹт, 1992-1997 ивлӓн председатель пӓшӓм ӹштен, «У сем» литературно-художественный журналын тӹнг редакторжы ылын.

    1961 ин тӹдӹм СССР журналиствлӓн союзыш пыртенӹт, 1984 ин Писательвлӓн союзын член лин. Россий писательвлӓн, Писатель союзвлӓн Международный сообществын съездвлӓн делегатеш икӓнӓ агыл айыралтын, Финно-угор писательвлӓн Международный ассоциацин президиумын член, 1994-1997 ивлӓн Россий писательвлӓн союз правленин секретарь ылын.

    Поэтын стих дон поэмывлӓжӹм руш, украин, суасламары, мордва, венгр, коми йӹлмӹвлӓш сӓрӹмӹ. Тӹдӹ ӹшкежӹ мировой дӓ руш классика гӹц пӱлӓ произведенийым кырык марлаш сӓрен: А.Пушкинӹн «Руслан дон Людмила» поэмым, У.Шекспирӹн «Ромео дон Джульетта» трагедим, А. Твардовскийӹн «Василий Тёркин» книгӓжӹм дӓ молымат.

    Национальный культурым дӓ литературым виӓнгдӹмӓштӹ Иван Горныйын пӓшӓжӹм кӱкшӹн ӓклӹмӹ, тӹдӹлӓн «Россий Федерацин культурын заслуженный пӓшӓзӹ», «Мары Элын культурын заслуженный пӓшӓзӹ», «Мары Элын халык поэт» почётан лӹмвлӓм пумы. «Отличник печати СССР» знак доно, Республикын Верховный Совет Президиумын, Россий писательвлӓн союз правленин дӓ шукы вес почетный грамотывлӓ дӓ медальвлӓ доно награждайымы.

    И.Горныйын шачмыжылан 85 шомы лӹмеш Картук сола библиотекышты «Писатель да поэт И.Горный» лӹмӓн книга выставкым ӹштӹмӹ. Тӹштӹ авторын биографижы доно, лыдыш сборниквлӓжӹ доно пӓлӹмӹ лин кердӹдӓ.

    Поэт лыдышвлӓжӹ гач туан сӓндӓлӹкӹм, шачмы велӹм, пӓшӓ мастар эдемвлӓм макта, портӱн цевержӹм, Земля вӹлнӹшӹ мирӹм перегӓш ӱжеш. Тӹнӓмок тӹдӹ чӹдӹ агыл лирический лыдышвлӓмӓт сирен. Икманяр лыдышешӹжӹ композиторвлӓ мырым сиренӹт.

 

Картук сола библиотекын заведующий Л.Л. Доброхотова.

   

©2013. Все права защищены.