Увервлӓ

В. М. Салдушкин лӹмеш районын фестиваль-конкурс

      Яратымы пӓшӓлäн кыды эдемжӹ йӓнгжӹмäт пуаш йӓмды. Техеньвлӓ логӹц иктӹжӹ – Виталий Михайлович Салдушкин, кыды 1970-шы ивлӓн Шӹндӹръял культура пӧртӹштӹ художественный  руководитель семӹнь пӓшӓлäш тӹнгäлӹн. Виловат культура пӧртӹштӹ халык театрын режиссёр пäшäлӹмӹжӹ годым, ӹшке йӹржӹ эдемвлäм цымырен мыштен. Коллектившӹ доно солаштыш ӹлӹшӹвлӓлäн шӹренок спектакльвлӓм шӹнден, концертвлӓм анжыктен. Эдемвлӓлäн  пурым  ӹштäш, ӹшке талантым халыкын пайдашкы сӓртäш вижӹм пиштен.

     13 апрельӹн Виловат культура пӧртӹштӹ театральный фестиваль-конкурс эртӹш. Районный мероприятий халык театрын лӹмлӹ режиссёржы, Марий Эл Республикын культурын заслуженный пӓшӓзӹжӹ дӓ самодеятельный композитор В. М. Салдушкин лӹмеш ылеш. Кым и пачелä ти фестиваль-конкурс Шӹндӹрйäл культура пӧртӹштӹ эртäрäрӹмӹ. Тэнеш ин Виловат культура пӧртӹшкӹ артиствлӓ ӹшке мастарлыкыштым халыклан анжыкташ толыныт.

     Пӹтäриок Картук сола гӹц Салдушкин гишäн ӹшке сирӹмӹ лыдышыжым Валентина Художникова сӹлнӹн шайышт пуш. Аксай сола гӹц артиствлä «Кынам ломбы пеледеш» В. Салдушкинын мырым йонгалтаревӹ. Троицкий-Посадский ДК-ан «Трудный подросток», «Бабушки и внучка» масакла сценкавлä анжышывлäлäн пиш келшевӹ.

     Изи  артиствлӓ, Маша Аксакова дӓ Вика Ильянова, руш  халык ямакым «Мӧскӓ дӓ Ӹрвӹж» йӓмдӹленӹт, тенгеок Арина Изицина, Таня Колесникова дä Злата Капитонова лыдышвлäм шайышт пуэвӹ. Стеша Беляева «Топни ножка моя» манын мыралыш.

     Пӹзӹкнырвлäн «Сӱӓнӓк  пелӓк» дä «Случай на дороге», Эмӓн артиствлӓн «Кым кесӹ», Аксай сола клубын «Изи Йынгы» драмкружокын «Бабушки - тусовщики», Шӹндӹрйäл культура пӧртӹн «Молодой  специалист» потикä сценкывлä халыкым  ваштылтевӹ. Любовь  Павлова «Проблема» монолог доно айыртемäлтӹ.

     Фестиваль-кокурсым мырызывлä: Настя  Андреева, Алексей Краснов, Наталья Веюкова, Анатолий Саватеев, Мария Капитонова дä ансамбль «Настроение» сӹлнештäревӹ. Раиса Капитонова дä Татьяна Калинина В. Салдушкинӹн «Кӹрнем ыльы лаштра ломбы укшым» яратымы мырыжым концертӹштӹ йонгалтаревӹ. Мастар гармонист-виртуоз Арсений Яйцов анжаш толшы халыкым фестивальын мычашеш пиш сусуэмдӹш.

Руслан Капитонов

©2013. Все права защищены.